Blaggedde-Värs 2026

 

Blyyb verspiilt

 

Botzdonner, hoppla, also guet

Do het jetz öbber aber Muet

Eso aini - herrjeeminee

Het Basel glaub no gar nie gsee

Schlicht und klar wies aim grad dunggt

Bringt si dr Kärn grad uff dr Punggt

Es goot um d Zuekunft – um die Glaine

Jä s Comité mecht dorum maine

Me soll jetz mol die Junge eere

Und d Blaggedde soll iine gheere

Mit iine sinn au die verbunde

Wo jäärlig als zig-dausig Stunde

Sich fir dr Noowuggs fescht yysetze

Me ka das gar nit gnueg hoch schetze.

 

Dä Binggis doo symbolisiert

Dr Noowuggs und transportiert

Die Lyychtigkait und au die Fraid

Dr Witz und schliesslig d Haiterkait

Wies nur bi Kinder so ka gää

Mir kenne si als Vorbild nää.

 

Bim Kinschtler, wo sich Orlando nennt

Isch s innre Kind au duurebrennt

Won är d Blaggedde het kreiert

Und mit däm Binggis raffiniert

Dr Uffruef an ys alli macht

Gännt Vollgas, und zwor dass es gracht

Dient lache, spiilen, ummerenne

Wies aigentlig nur Kinder kenne

Hauets uff d Gass und löönt ain uuse

Kasch s Joor duure no gnueg lang pfuuse

S het numme d Fasnacht die Magie

Drum löönt ys alli Kinder sy

Blyyb verspiilt als glaine Gnopf

Das drifft dr Nagel uff dr Kopf.

 

Vyyl Spass iir Kinder, juhui juhee

Winscht sFasnachts-Comité